Act 11 | ASO | STEP | Ne'mine ogavo aposolokisi Izesu' zuho linge ma Zudaia misubou' minanikisi ingine nene heta ato' vesi O'moso'mi gamazila vi gi'mizani' ne'mi gamazi vogavo gilani'.

Acts 11

Gamazi Nene Izesu' Zuho Zelusalemi Ebeku' Minani' Nene Petolo' Vetete' Ogo Lo-ngimine' Gamazi

1 Ne'mine ogavo aposolokisi Izesu' zuho linge ma Zudaia misubou' minanikisi ingine nene heta ato' vesi O'moso'mi gamazila vi gi'mizani' ne'mi gamazi vogavo gilani'. 2 Nemu' Petolo' Zelusalemi numuda tine' molo duvavo Izesuda alisa gilave gomu' oko'ine lolovo huko hulo-ngedo O'moso'mi noso've molo-ngedelone li amuzonga laa' ave nete Petolo'ni elemi ti' li li-imani': 3 Gaza O'moso'mi noso've nomine' alevetida vo engi' a'ninguti' noso' nite' no naine' nene nanimu' nane. 4 Ne'mine likevo Petolo' aza api' ogo ti' lo lo-ngemo ne'mine ine' aka nene lo ngolo' lo lo-ngimine': 5 Naza Zopa numuno ebeku' mino O'mosola noluvo madu'ne gopo ogavo mino vamu' ti' ogo ninguve: Inite' ma lavolavo naba gidini minine' nene lumolati' lumolati' di uhu'vizi hulikevo Okulumokuti' zou zou lo nolimivo ninguvoni'. Lemo nouvodo' minavo 6 a'mine'mi lulou' gisili hizo ninge lamine' uvoni'. Gaha nama ato atoli'mine gize'ine a'ine neine' nominekisi ninguve. 7 Ne'mine ogo gamazi ma ti' lo soto' o nimine': Petoloo, gaza oto ma belo novo. 8 Ti' lo soto' o nemavo naza ti' lo luve: O've. Guve'nesi ve make, ne nomive. Ha nitekisi goloso nitekisi nene gopo nosa'muve. 9 Ne'mine lokuvo Okulumokuti' gamazi imine' molo line': O'moso'mo inite' mamu' goloso nite' do hulo do lamine' ogavo ma a'mine nite' nene ha nite' ve goloso nite' ve lamo ha dalosane. 10 Ne'mine lo line'za a'mine gamazivo' lo volelo' melo' ogo lokusivo gamene setohamo ogavo a'mine nite' mata' nene gelelehe' ogo ihe' Okulumoku' dizo vine'. 11 Dizo vavo a'mido' geti evene' setihami Kaesalea numudoti' elese igi minuvoni' numuda hetelani'. 12 Hetelikevo O'moso'mi Sikalahuli'mo ti' lo lo-nimine': Gaza geni gebelamivo inginesi vozo. Lavo nazasi ido' Izesu' zuho sikisi nesi vo a'mine ve'mi numungu' dizekunivo 13 gamazi ti' lo lo-limine': Neni' numu'neu' angelo' mali'mo dizo soto' o nemo ti' lo lo-nimive: Gaza Zopa ebeta evene' ma ngimiselanivo vi Simoni' gulive ado' gohi ma Petolo' ve lo minine' nene ele'mizi ikevo 14 gezesi ido' gei' numungau' ingani' zuhosi O'moso'mo do lungu' izeline' gamazi lo-lengemavo lamine' ilisave lo line'. 15 A'mine gamazi lo-nemavo gamazi api' ogo nolo-ngimuvo O'moso'mi Sikalahu' nene gana' lemo lelita minidi'mino inginelasi lemo minine'. 16 Lemavo ne ningo Guvetesi ve'mo Zohane' aza evene' noso holo-ngedavo haza nosovo' dani'za lingine nene O'moso'mi Sikalahu' neve ne dalizave line' gamazi malo' gohi ga'ne gele molo giluve. 17 Laza Guvetesi ve Izesu' Kilisito'nimu' gele ele'vole' okunivo O'moso'mo leze lehize-lidine' inite' Sikalahu've nene a'mine ma'mino engikisi lehize-ngidine' ma ve. Nemu' naza amuzo malehe noosa eze o've lo-delohe. 18 Ne'mine line' nene gili mulu'ningu' hongu lavo gamazi gohi mo li-dami O'moso opo'ni li ti' li lani': Oho, O'moso'mo gele ngemavo heta ato' vesi lu'ine di velepe' izikevo minivi' minivi' ilizani' ngemeni damenisi O'moso'mo ngeme noloseive li lani'.

Adiokia Aleve Gili Ele'vole' Ani' Gamazi

19 Setehano'ni bili hilisa goboni mili-ngidikevo Izesu' zuho hutile' igi vanguti' ingine linge ma Hoinikia misubou' vi minani'. Ido' linge ma sipiu' dizi vi ailani ma gulive Kipilo nela vi minani'. Ido' linge ma vi Adiokia ebeta minani'. Ingine muki' vi mini evene' ato' ma li-ngimami Zuda vevo' Izesu' gamazi've li-ngimani'. 20 Ne'mine ani'za inginelati' ve linge ma Kipilo vesi Kilene vesi ingine Adiokia ebeku' vi mini nGiliki aleve nene Guvetesi ve Izesu'nimu' gamazi lamine' nene li-ngimani'. 21 Nili-ngimavo O'moso inginesi mino amuzo ngemavo evene' muki' engi' gamazi gili Guvetesi vemu' gili ele'vole' igi ezela vi gi'mizani'. 22 Engikumu' nene gamazi lamine' ma vo Izesu' zuho Zelusalemi ebeku' mulise milaa' aveti ga'ningu' ogavo Banabasi'ni a'mine Adiokia numuno ebeta imiselani'. 23 Imiselikevo vo hetelo O'moso'mo ise'ine izo do lamine' o-ngidine' nene ningo gelo mulunou' lamine' gelo Guvelesi vela lu'ine mili ele'vole' ilizave lo ga'ine dani'. 24 Ido' Banabasi' ne'mine ine' nene aza ve lamine' mino O'mosomu' amuzo molo gele ele'vole' ogavo O'moso'mi Sikalahu' lulou' gono do minaa' ine' nenako nemu' nene ne'mine ine' ve. Ido' evene' muki' gamazi've gili Guvelesi vela vi gi'mizani'. 25 Ne'mine ikevo Banabasi' vo Saulo'ni vise' ogo ningelesa Taliso ebeku' vine'. 26 Vo ningo Adiokia ebeta ele'mizo ogavo Izesu' zuho di mulise mili mini evene' muki' mono' apizi ngimi ngimi' igi nizasivo kilisimasi hamo' vine'. Ido' Adiokia ebeku' gana' api' igi Izesu' evenele zuho mamu' gulive'ine mili Kilisiteni aleve ve lani'.

27 A'mine gamene neu' O'moso'mi veleuti' gamazi li soto' ave polohete linge ma Zelusalemi numudati' lomi Adiokia ebeta vi hetelani'. 28 Heteli engikuti' ve ma gulive Agabo'ni nene O'moso'mi Sikalahu' ne'mo do ote-davo misubo mukiku' ga'na naba soto' olosa neivo ne'mi gamazi lo-ngimine'. Ido' alinge' Kalaudio' Loma veti guve'inesi ve naba lolo' ogo neivo a'mine ga'na naba soto' ilingumu' line' gamazi gihile izine'. 29 Lo-ngemavo gili Izesu' evenele zuho ma ga'ine gili ti' li gamazi di hamo' igi lani': Laza hamo' hamo' ogo inite' neine' votigilelo' hulo-ngedo leze zuho Zudaia misubou' minave noso' nite' nevo'mine ngemelone li lani'. 30 Ido' laado' igi a'mine inite' nene Banabasikisi Saulokisi di vi mono' gizebo vetine ngimilisive li ngimiselikevo vasine'.